Wednesday, July 11, 2007

مدوّنات ... بالبلازما كلاسترز

من عقود من الدهر أبحث عن إجابة
أمي لما كانت بتذاكرلي كانت بتقول
الصيف ده تلات شهور
نفسي أعرف مين اللي سرب المعلومة الغلط دي في عقلها
وعقلي وعقل كل الصغار والكبار من أيام الطالب المصري الأول
اللي جالس القرفصاء في المتحف وحتي يومنا هذا
الصيف في مصر يا أمي الغالية زي أي حاجة تانية
إحنا مش زي أي حد
إحنا أم الدنيا
علشان كده الصيف عندنا ست شهور
من أول شهر أربعة لغاية شهر عشرة
............
حر ودخان وسحابة سودا والحمد لله
رطوبة أو جفاف زي ما تحب حضرتك
زحمة وكأن سكان مصر بيتضاعفوا في الصيف
كسل ثم كسل ثم كسل
بصحي كل يوم مش عايز أعمل حاجة
يمكن بيرشوا مخدر في الجو
مش حتقدر تفتح عنيك
يارب
نفسي ييجي اليوم اللي يكيّفوا فيه الشوارع
يارب
............
رغم كل ما سبق أعلاه
الصيف ده طلع ملهم لبعض المدونين
رغم إن فيه مدونين كسالي زي سعادتي كده
إنما فيه مدونين إزدادوا تألق وحيوية في الصيف
وفي عز الحر
جمعهم هدف واحد عايزين يحققوه
برضه في عز الحر
بس معاهم مش حتقدر تغمض عنيك
هوا وبرد جميل وإحساس زي الفل
مدونات ..... بالبلازما كلاسترز
...............
(1)
اللعبة
لعبة يلعبها 24 مدوّن حتي الأن
يكتبوا قصة واحدة بدون ما يتفقوا عليها
الأول يكتب فصل التاني يكمل عليه
التالت يكمل عليه وهكذا دواليك
علي سيرة أيام المذاكرة
نفسي أعرف كلمة دواليك دي يعني إيه
الجميل في اللعبة إن الأحداث غير متفق عليها مسبقا
كل واحد حيمشي القصة حسب فكره ورؤيته وفهمه للقصة
...
العبد لله الكسلان الحرّان إنضميت معاهم
لو حد عايز يلعب معانا أو عايز يعرف تفاصيل أكتر يتفضل
عند العزيزة أميرة في بيتها الصغير
وأهلا وسهلا بيه طبعا
.......................
(2)
يوجا
مجموعة جميلة من المدوّنين عملوها
دعوة جميلة للتفاؤل والنظر للأشياء بحب وأمل
مدونة خواطر سعيدة فقط
أفراح بس
تفرحك وتفرحني وتفرح أي حد يقراها
شعاع أمل يعني
وزي ما ختم العزيز مبرمج حرأول بوست فيها
حقولكم
دمتم بكل سعادة وسرور وتفاؤل
.......................
(3)
تماحيك
مجموعة جميلة من مدونين بحبهم
عملوا سيمفونية حب للحياة
بحلوها بمرها .. بجدها وهزلها
بفرحها وضحكها .. بحزنها ودمعها
تماحيك في حب الحياة
في فتافيت الفتافيت
وزي ما قالوا حقول
علشان نعيش ... علشان نفرح
لازم نتمحك
حبها حتحبك
................
شفتوا الصيف ملهم إزاي
ربنا يكتر الحر كمان وكمان
خلي الناس الجميلة دي تبدع كمان وكمان
مش بقولكوا
مدونات ... بالبلازما كلاسترز
......
تحديث
ودي كمان مدونة بالبلازما كلاسترز عرفتني بيها
(4)
مدونة عن حياتهم وحياتنا كمان
مجموعة كمان لذيذة
عملوا الحياة مراجيح
مرح وفرح وذكريات
حياتنا واحنا حرين فيها ... مراجيح هنخليها

25 comments:

  1. totaJuly 11, 2007 at 1:05 PM

    يا مجهول
    انت مش بترد على تعليقاتى ليه يا دكتور معتزل الفن ولا ايه
    معقولة كده برده
    على فكرة اكثر استمتاع ليه بحصل عليه من عالم التدوين هو التواصل انى اتكلم واخد رد على كلامى انت حضرتك بتحرمنى من متعة التواصل

    مبروك على وجودك فى اللعبة
    واضح انه مش الحر بس هو الملل من الوحدة وتكرار نفسنا من خلال التدوين المفرد
    فيمكن دى وسائل جديدة للتغلب على الاحساس ده
    بس اهم نقطة فيها هى التنظيم لان العمل الجماعى فى مصر يحتاج دايما للتنظيم علشان ينجح
    اتمنى ليكم النجاح ولكل مجموعة عمل بتدور على رسم السعادة والبسمة على وجوه المعلقين
    تحياتى

    ReplyDelete
  2. مجهولJuly 11, 2007 at 5:27 PM

    توتا الرقيقة الجميله
    تصدقي ان فاضلي ساعه واحدة علي مغادرة القاهرة والسفر لظرف طاريء

    قريت تعليقك دلوقتي
    ويظهر انك زعلانه وده ممكن تتهدله جبال
    .......
    لا حرمك الله متعة الوصل والتواصل وجعلك من عباده الذين اختصهم بحب الناس بعد حبه وحب ملائكته
    ....
    ربما عذري ليس بعذر لعدم الرد ولكني كنت بعد استقراري سأرد بالطبع
    فلاتعلمين حبي للتواصل الفكري والوصل الوجداني ولهذا دخلت عالم التدوين لأستمع قبل ان اسمع
    وخصوصا منك بما وهبك الله من فكر ووجدان
    .......
    بالنسبة للعبة
    تمنيت ان تكوني معنا لكن يبدو انه سيسبب لك ارهاق وتعلق وارتباط بمدونات كثيرة تتضارب مع عملك ربما
    .......
    معك ان التدوين الفردي يشوبه بعض الملل وخصوصا في الحر يمكن
    واتمني ان تنجح الفكرة من خالص قلبي وان تنجح كل افكار المجموعات الاخري
    انشاء الله
    .........
    انا عن نفسي عايز اعمل مدونة جماعية ينضم فيها اكبر عدد من المدونين
    مدونة عن مصر
    عن الحاجات الحلوة بس في مصر
    حكاوي ولاد البلد
    مقاتلين اكتوبر
    شخصيات تاريخية
    شخصيات حالية
    اماكن
    مصريين
    كل حاجة في البلد دي حكاية لوحدها
    نفسي بجد اعملها
    مصر مش فساد وفتن وقلق
    لسه فيه ناس كويسين
    عايز اعلي الناس دول لغاية ما يلمسوا السما
    وانتي اول من تمنيت ان تكون معي
    وياريت اي حد يكون معايا
    مش حتكون المدونة اغاني ولا كلام عالي
    حتكون عن مصر اللي منغير صوت عالي
    ياريت تفكري في الموضوع ده ولو مش حتقدري مقدر ذلك تماما طبعا
    والتفاصيل انا حعمل ليها بوست لما استقر بس

    وفقك الله عزيزتي في حياتك وعملك

    ReplyDelete
  3. ...July 11, 2007 at 8:20 PM

    مجهول
    واضح انك سافرت خلاص
    بس لازم اقوللك ان الحر يعمل المعجزات
    اصل انا ممكن استحمل اى حر
    لكن اول ما الشتا يدق البيبان اتجمد واعيش فى بيات شتوى غريب
    حتى افكارى بتتجمد

    المدونات الجماعية فكرة جميلة وكويس انك نوهت عن لعبتكم
    علشان اتابعها

    تعود للحركة التدوينية المباركة بكل خير وسلامة
    :)
    بانتظارك بجد

    ReplyDelete
  4. Dr.khaledJuly 11, 2007 at 8:26 PM

    طب طري الجو يا زمل
    :)

    ReplyDelete
  5. BellaJuly 11, 2007 at 9:13 PM

    حلوة قوي مدونتك

    وحلوة قوي قوي التدوينة دي لانها عرفتني بمجموعة مدونات ماكنتش اعرفهم قبل كده

    وكمان المدونات الجماعية دي حلوة قوي

    خد بقى ياسيدي المدونة دي ضمها عليهم

    http://maragi7.blogspot.com/

    اسمها مراجيح

    عفاريت جدا اللى عاملينها
    متوقعة انها تبقى مدونة حلوة قوي تطري علينا حر الصيف وتلطف الجو

    تحياتي

    ReplyDelete
  6. حائر في دنيا اللهJuly 11, 2007 at 10:04 PM

    الحر
    يا دي الحر
    وخنقة الحر
    وقرف الحر
    وعدم النوم في الحر
    انا شخصيا بكره الحر والصيف عموما واعشق الشتاء والبرد والتكتكة وافكارها اكثر من السيف الذي يجلعنا كقطعة الجيلاتي لا تتحمل كثيراً

    مع تحياتي
    السلام عليكم

    ReplyDelete
  7. حائر في دنيا اللهJuly 11, 2007 at 10:05 PM

    الحر
    يا دي الحر
    وخنقة الحر
    وقرف الحر
    وعدم النوم في الحر
    انا شخصيا بكره الحر والصيف عموما واعشق الشتاء والبرد والتكتكة وافكارها اكثر من السيف الذي يجلعنا كقطعة الجيلاتي لا تتحمل كثيراً

    مع تحياتي
    السلام عليكم

    ReplyDelete
  8. koukawyJuly 13, 2007 at 6:02 PM

    بمناسبة دواليك ..انا زمان كنت بسمعها دواليب
    كنت بقول و ايه علاقة الدواليب بالموضوع
    ههههههههههههههههههههههههههههههههه
    يا للا يا عم شد حيلك في اللعبه
    هو صحيح الصيف مقرف و مخنق
    و انا بحب الشتااااااااا عايزه الشتااااااااا
    هتولي الشتاااااااااا
    مليش دعوه بقييييييييييي

    ReplyDelete
  9. Gid-Do - جدوJuly 15, 2007 at 4:34 AM

    صديقى مجهول

    قمنا بالدعاية المجانية للعبة ـ مبروك ـ عاوز حقى ناشف

    ReplyDelete
  10. مجهولJuly 15, 2007 at 4:42 AM

    حلم
    طيب يا ستي ربنا يديم عليكي الصيف والحر والابداع
    هاهاهاها
    سعيد لتواجدك

    ReplyDelete
  11. مجهولJuly 15, 2007 at 4:43 AM

    خالد العسل
    اطري الجو
    ماشي يا زميل
    امشي روح علي مدونتك اصلي حرش ميه
    ههههههههههه

    ReplyDelete
  12. مجهولJuly 15, 2007 at 4:43 AM

    بيلا الجميلة
    ماشي
    علم
    وينفذ

    ReplyDelete
  13. مجهولJuly 15, 2007 at 4:44 AM

    صديقي الجيلاتي الحائر
    والله زيك يا جميل بالظبط
    حاسس ان انا حتة جيلاتي او تلج بتدوب
    ربك يهونها يارب
    سلام

    ReplyDelete
  14. مجهولJuly 15, 2007 at 4:45 AM

    كوكاوي
    دواليب
    ههههههههههه
    لا دي بتاعت الهدوم
    ماعلينا
    الشتا حييجي متعيطيش
    حتولها الشتا ياولاد

    ReplyDelete
  15. مجهولJuly 15, 2007 at 4:47 AM

    جدو محمد
    يا استاذي حقك محفوظ
    انزل بس مصر انته وحتشوف
    يا احلي جدو في الدنيا

    ReplyDelete
  16. عدى النهارJuly 15, 2007 at 6:00 AM

    جميلة فكرة اللعبة.. يظهر إن الصيف مُصر إن يكون له إلهامات جميلة

    متابع إنشاء الله

    ReplyDelete
  17. محض روحJuly 15, 2007 at 4:21 PM

    يمكن فكره المدونات المجمعه حلو
    ياعني بحكم ان الصيف بيولد ملل تدويني غريب

    :)

    تحياتي يافندم

    ReplyDelete
  18. دكتور مستكنيصJuly 17, 2007 at 7:43 AM

    بوستك جميل وروحهم جميلة اوي صدقني مفيش احلي من فكرة التيم ستاف وان شوية شباب دماغهم نضيفة يعملوا حاجة سوا
    اول زيارة ومش هتبقي الاخيرة
    تحياتي

    ReplyDelete
  19. .:.-=- ELGaZaLy-=-.:.July 17, 2007 at 8:05 PM

    ازيك يا دكتورنا الجميل يارب تكون بخير...

    تعرف بحس انك شبهى فى حجات كتير انا بردة بس لسة راجع مصر حضرتك...

    يارب تكون بخير وربنا يكرمك يا جميل...وعجبنى موضوع الصيف دة

    ReplyDelete
  20. فى القلبJuly 19, 2007 at 6:41 PM

    ديما بحب الاتحادات
    وبحب فكره انتماء الفرد للجماعه
    ده نادر أوى فى بلدنا
    أنا بحس أن المدونين هيكون لهم دور كبير فى
    تغير البلد لو أستمرو بنفس الروح ألى شيفاهه
    ألف مبروك على كل المدونات الجماعيه
    ومذيد من الافكار الابداعيه

    ReplyDelete
  21. AnonymousJuly 21, 2007 at 1:12 AM

    هل الرب الإله ذكر؟؟؟


    هل قدم احدهم الاثبات على ذكورة الله


    أم هو أسقاط السلطة الذكورية على مفردات الأسطورة

    ReplyDelete
  22. أميرة البلطجيةJuly 21, 2007 at 12:33 PM

    دكتور
    معلش انا بعتلك حاجات ع الميل يا ريت تشوفها وترد عليا ضرورى
    صباح الخير

    ReplyDelete
  23. Hadota ... حدوتةJuly 21, 2007 at 4:43 PM

    السلام عليكم
    المدونة بتاعتك حلوة اوى وعجبتنى جدا احييك عليها
    واتمنى اكون صديقة

    الحر فى مصر بيستمر كتير
    ودا راجع لطبيعة المناخ اللى تلت تربعه اتغير
    كنت اسمع زمان
    مناخ مصر حار جاف صيفا دفىء ممطر شتاءا

    طبعا فشراية كبيرة
    الحر والرطوبة عملة عمايلها
    والشتاء تلج ومفيش مطر كتير
    على الاقل هنا فى القاهرة
    الشتاء كلهم مرتبن تلاتة مطرة

    فى اليف المدونين بينشطوا لانهم بيبقوا خدوا اجازات لانه فيهم طلبة كتير

    فكرة اللعبة جميلة وانا هدخل اعو اشوف ايه الحكاية لانى بجد عجبتنى جدا
    تحياااتى ليك



    حدوتة

    ReplyDelete
  24. -_-July 23, 2007 at 6:41 AM

    كده يا مجهول تنسى ال
    WUB
    دول 70 مدون من دول العالم كله يا راجل

    ReplyDelete
  25. مجهولJuly 25, 2007 at 7:47 AM

    الأعزاء
    أشكرك جزيلا علي مروركم وكلماتكم الطيبة وأتمني لكم حياة رائعة

    واتمني ان تتابعوا المدونات الجديدة
    ............
    العزيز شارم

    صدقني يا عزيزي لم اعلم عن المجموعه دي غير منك
    معلشي الخطأ مردود يا جميل

    ReplyDelete