Monday, March 19, 2007

الحقبة النباتية .. يوميات كتكوت

عن النباتات أعود لأكتب يومياتي
أيها السادة و السيدات قد إنتهت التجربة
وإليكم مذكرات الأيام
...........
اليوم الأول
مر بسلام وسكينة لظروف إنشغالي في سفر طارئ
وطبعا لا غني عن رفقة الفول و مشتقاته في الظروف دي
...........
من اليوم الثاني لليوم الرابع
كنت أصارع نفسي للوفاء بالعهد أمام نفسي
ولا أسقط صريعا أمام حتة لحمة أو نص فرخة
ونجحت بالكاد
وأثبت لديكم .. قوة عزيمتي لرفضي عزايم كتير
وإغراءات كثيرة للأكل في مطاعم مع صحابي

ربنا يجازيهم
............
من اليوم الخامس للأخير
بدأ الجهاد الحقيقي
مقاومة مستمرة علي جميع الجبهات
إلي أن وصلت هنا و بكتب لكم
............
خسرت في التجربة كتير أوي
عدد 4 عزومات من أصدقاء ليا
ماهما بيعزموا بقلب
كمان خسرت أكل الحاجة .. بط وفراخ وحمام ولحمة
..........
تذكرت يوم كنت بسخر من فكرة أن تكون نباتي
تذكرت صديقي الجميل و الرائع طه
النباتي المخلص للجزر والكوسة
كنت أسخر منه وأقوله

إنته فاكرني كتكوت باكل نباتات
وها أنا اليوم أصبحت لا مؤاخذة

يعني ..... نباتي
طول لساني ده حيوديني في داهية يوما ما
.........
في يوم من أيام الحقبة النباتية
رحت أزور صديق ليا في بيته وتناسيت إني رحت وقت غدا
طبعا دي عادتي أيام المرحلة اللحمية علشان يعني
أعزم نفسي من نفسي كده
وراحت والدته حاطة الأكل
طيب أقول إيه .. بقيت نباتي يا ماما
أكيد حتقولي ألف لا بأس يا إبني
مفهوم عاداتنا عن أن الأكل هو اللحمة ومادون ذلك
مقبلات و فواتح شهية
بقيت مش عارف أخلع
قلت أكل رز وشوية سلاطات
صاحبي بيبصلي بدهشة و يقولي يالهووي .. خير
إنته بتموت ولا إيه .. ولا نسيت شكل اللحمة
اللي قدامك دي جنب طبق الشوربة علي اليمين
لحمة يا إبني
قلتله الحقيقة و قلتله احب علي يدك يا خوي
مش عايز فضيحة
.. وأنتهت بسلام
وبالهنا و الشفا التلات أطباق لحمة يا كريم
..........
بقيت أتجنب المشي بجوار مطاعم بتشوي لحمة وفراخ
علشان بجد بعيط
...............
نتكلم عن المكاسب بقا
الميزانية
بصوا بقا أولا أنا كسبت ماديا كتير جدا
أصل كيلو اللحمة بقا غالي أوي
والفرخة المشوية بتجيبها ببتاع 25 جنيه علي الأقل
وأكبر مكسب إني أجلت عزومة لواحد صاحبي علي حسابي
بمناسبة فوز ليفربول علي البارسا
يارب .. ينساها
...........
الصحة
كنت علي مدار العشرة أيام نشيط جدا جدا
وده ليه أسبابه العلمية
والطبية
..........
ردا علي توتا الجميلة أنا إكتشفت إني بقيت رفيق
بالحيوان اللي مأكول في شبابه
وكل ما أعدي قدام جزارة وقرية مشويات ..أعيط
..........
التجربة في حد ذاتها أفادتني صحيا وبدنيا جدا
وأفادتني قبل كل شئ نفسيا وشكلي حكررها
بس بعد راحة مع الدجاج و اللحوم الحمراء

حيث العودة للكائنات اللي بتمشي

...............

تنويه هام
أعدكم إنشاء الله أن أكتب عن الفوائدالصحية و النفسية بالنسبة للإتجاهين
اللحمي و النباتي في بوست .. قريبا

..........................

11 comments:

rosealia29 said...

هههههه الله حلو جداً .. تدريب الروح على الاستعلاء أمر مش هيّن .. بجد 10/10

Memo said...

walhy el3zim mafhma ay haga
ana 7asa eny msh men hena

أميرة البلطجية said...

حلو اوي انك تقدر على نفسك في اي حاجة المدة دي
تعرف..شجعتني..مش في اللحمدة بذات..بس في اي حاجة
انا فعلا مغلطش لما حطيتك وزير ثقافة..اهو كده الوزرا ولا بلاش..بيبقوا قدوة للشعب ومعاونين ايجابين للحكام اللي زيي
عموما يا مجهول قليل من اللحمة لا يفسد للود قضية
ومستنية اوي موضوع الاثر النفسي لأكل اللحمة وللبعد عنها
بسرعة بليز

الأغاني للرأفتاني said...

صديقى مجهــول
اعتقد ان اللحوم هى سبب جميع امراضنا..
النباتات والاسماك تاثيرها السئ على الجسم قليل جدا..
ولذلك تجدنا نحن الاسكندرانيه..احسن من سكان القاهره مزاجا وصحه
هههههههه
والحق اقول ان عادتنا الغذائيه كمصريين سيئه جدا
فنحن لا ننظر الى الكيف ولكن الى الكم..
فنحن نأكل مع البطاطس ارز ومكرونه وعيش وجميعهم نشويات..
والنتيجه..اجسام كاجسام البغال

لكنه الكرم يا صديقى..

tota said...

المجهول
بعد ان عشت ايام تشابه الفصيلة العشبية فى غذائها نحمد الله على سلامتك والعودة الى فصيلة اكلى اللحوم
التجربة فى حد ذاتها ممتعة ليس فكرة نباتى او لا بقدر فكرة التحكم فى ذاتك وتطويعها الى فعل ما تريده
دى تجربه ممارستها من وقت لاخر يشبه ممارسات اليوجا
ان ترى وتشتهى وتمتنع فهذا رائع
اما التجربة الفعلية فى كونك نباتى لفترة لو لم تتم بصورة صحية سوف يكون هناك معاناه لان وجود بروتين مهم جدا لذلك يجب محاولة تعويض ذلك جيدا ولا اشرح بقى اهمية البروتين فى كل وظائف الجسم
اذا كان السبب رأفة بالحيوان فلا اتفق على تحريم ما حلل الله
انا كان السبب هو مجرد تجربة فها قد ذقت طعمها وشكلها مكنش طعمها حلو قوى والدليل هو الانتقام انا سامعة منطقتكم مفيهاش ولا فراخ ولا لحمة بعد الانتفاضة من كونك نباتى نسفت المنطقة يا مجهول
تحياتى

Reema said...

الف مبروك نجاح التجربة ومرورها بسلام
وكويس انك حسيت انها مفيدة بالنسبة لك
ياريت تكررها انا شايفة انك ممكن تتعود على انك تكون نباتي
صدقني احسن بكتير
:)
بس الفكرة مش رفقا بالحيوان وبس هي اكتر مدى تقبل النفس لفكرة الذبح واكل اللحوم او الطيور دي
وبالنسبة لي هى حالة نفسية مش اكتر
من غير قهر للنفس ولكني مقتنعة بالفكرة
سلاماتي

مجهول said...

ماشي ماشي يا ست روز
ياشماته الناس فيا
هههههههه



ميمو
خلاص ياستي حفهمك
كنت بعمل تجربه اعيش عشر ايام نباتي ودي يومياتي فيها
وسعيد لزيارتك

مولاتي
اشكرك علي مدحك لوزيرك بس برضه عايز علاوه بقا


صديقي المهاجر
اسعد دوما لتعليقك عندي
ومشكله شعبنا انه بتاع مزاج
بيحب يعمل كل حاجه وهوه مبسوط
تحياتي
ههههههههههه



توتاااااااااااااااااا
هيا الجزيره زاعت الخبر
انا مبطلتش اكل من انبارح
بتاع 14 كيلو زدتهم من انبارح
قفشاني علطول كده


ريما
انسي اكون نباتي
راجعي نفسك انتي
هههههههههههههه

koukawy said...

الله الله الله
انت بتسخر من الكتاكيت و الكوكوهات و لا ايه يا مجهجه ؛ علي فكره انا نباتيه بقيلي 10 سنين اهه و عايشه زي الفل
و مش بقول ان اللحمه حرام عشان محدش يلبسني مصيبه انما انا مقطعاها و مش بحبها
و يا للا يا مجهجه شكلك كده هتبقي كوكو انت كمان قريب
ههههههههههههههههههههههههههههه

محض روح said...

مشاء الله كويس انك عرفت تصدمد
انا جربت 4 ايام 2 خضار 2 فاكهه
وبصراحه زهقت فى اليوم الخامس
:(
بس كملت سمك

ربنا معاك يامجهول

بعدك على بالى said...

توتا قالت اللى عاوزة اقوله (دايما بتسبقنى ) فعلا المهم فى التجربة هو اختبار الارادة اللى مش كتير بينجحوا فيه، ودى مش اى حد بيقدر يختبر ارادته ويقدر ينجح، بالذات فى تجربة صعبة زى دى، تجربة مقاومة اشياء بتحبها وممكن تضعف قدامها...
احييك بشدة وجدا واعتقد انه حتى بعد عودتك للاكل اللحوم بانواعها صدقنى مش حتكون زى الاول، مش بتكلم عن الكمية اكيد انت فاهنمنى..
مرة تانيه بحييك

مجهول said...

متزعليش يا جميله ياكوكو
خلاص كلنا في الهوا كتاكيت


محض روح
والله انا كنت حتجنن
ياشيخه خلينا في اللحمه احلي


بعدك دايما علي بالي
توتا غلباكي كده علطول باين
بس توتا بقا نقول ايه
بس تعليقك عندي بفرح بيه جدا يارقيقه
يا زكيه يا مثقفه يا يا
الله مش بقولك من تأثير النباتات بقيت رقيق زي ورقه الشجر