Tuesday, March 27, 2007

مشاهد متفرقة

المشهد الأول
رايح السينما
أمام باب السينما بجوار شباك التذاكر

هو:أستاذ لو سمحت هنا تذاكر أيظن ؟
أنا:أه .. أيظن ومطب صناعي
صاحبه:تيجي ندخل مطب صناعي؟
هو:إيه ياعم مطب إيه وبلاعة إيه .. أيظن ده
فيلم إوعي وشك..فيلم دلع ودماغ
صاحبه:ياعم ده هلس
هو:أمال جايين السينما ليه؟ نقرا يعني
صاحبه:رأيك أيظن صحيح ههههه
...........
المشهد الثاني
جوه الميكروباص
قاعد لوحدي مستنيه يحمل علشان يطلع
شاشة عرض صغيرة مواجهه للمقاعد

العنب .. العنب العنااب
فكهاني وبحب الفاكهة وبموت فالموز والمنجه
والعنب العنب العناااب
وواحدة إيه .. ملهاش حل قاعدة ترقص
والميكروباص بيملي ويزيد الركاب
وطلع الميكروباص
............
المشهد الثالث
جوه برضه في الميكروباص
هو:إيه ياعم قلة الأدب دي
صاحبه:هوه مش فن ولا إيه وبص
وإسكت ومتع عنيك
هو:ههههههههه علي رأيك والنعمة
ضوفارها بمراتك هههه
صاحبه:بس يا .... إسكت
الميكروباص كان فيه سيدات وبنات علي فكرة
...........
المشهد الرابع
علي الرصيف .. بائع كتب قديمة ومستعملة
أنا:بكام الكتاب ده يا حج؟
هو:بإتنين جنية يا أستاذ
تجذبني رغما عني بقوامها الذي لايقاوم
يالهوي .. الله يكون في عون الشباب
أنا محدثا نفسي:أهي دي الستات ولا بلاش
أنا متسائلا:بكام المجلة الأجنبي دي ياحج؟
هو باسما:بخمسة جنية
أكيد قالها منغير أستاذ
...
نسيت أقول الكتاب كان رواية إسمها البؤساء
عن رائعة الفرنسي فيكتور هوجو
وترجمةبأسلوب حافظ إبراهيم شاعر النيل
كاتب مقدمتهاالإمام الشيخ محمد عبده
............
المشهد الخامس
في الجامعة
الطالب:ياعم ده دكتور معفن وحمار
والله كنت ممكن أضربه
زميله:صراحة يعني إنته غلطان شويه
يعني لازم تضحك وتتريق علي كلامه ومترضاش تسكت
الطالب:يابني ده فاكر نفسه حيتنطط
علينا بكلمتين حفظهم لما كان طالب دحيح
شايف شكله عامل إزاي مش قادر يمشي ولا يتكلم
ثم أنا أتكلم براحتي مش عاجبه يمشي ههههه
زميله:هههههه الله يخرب بيتك..علي رأيك يغور
............
المشهد السادس
برضه في الجامعة
هي:متنساش والنبي تجيبلي الورق بكره
أصلي محتاجاه والإمتحان قرب
هو:من عينيا إنشاء الله بكره يكون عندك
هي:ميرسي علي ذوقك ربنا يخليك أشوفك بكره بقا
سلام عليكم
بعد رحيلها
زميله:إيه يانجم إنته بتظبط ولا إيه؟
هو:لاياعم دي تسالي لب وسوداني
زميله:بس حتعرف ؟دي شكلها بنت ناس ومحترمة
هو:شايف لابسه إيه ؟هههههه
ياعم دي شكلها لا مؤاخذة
زميله:يعني باللبس يعني
هو:مش شرط بس هما في الأول بيبقوا كده
عايشين الدور شوية
أنا عارفهم
.............
المشهد السابع
أمام شباك مصلحة حكومية
ومافيش طوابير..أصلهم جايين الساعة واحدة
هو:لوسمحت عايز الختم يوضح بس علي الورقة دي
الموظف:ليه يعني يا بيه؟
هو:ياسيدي علشان مرجعش تاني بالورقة
الموظف:تعالي الساعة واحده يكون بتاع الختم جه
هو مخرجا عشرة جنيهات:طيب إتفضل شايك وقهوتك
أصلي تعبتك معايا
الموظف:إستني كده اشوفلك الختم
في المكتب اللي جارنا
...........
المشهد الأخير
في بيتي وأمام التليفزيون
ورائعة محمود أبوزيد كاتبا
وعلي عبد الخالق مخرجا
ونهاية فيلم الكيف
جوه التاكسي
مصري راجع لبلده بعد غربةوسفر
وسواق تاكسي عايش فيهاوإتغير
وكاميرا الفيلم تبتعد تدريجيا موحية
لمشهد واسع وبعيد للقاهرة
كنت فاكر الكاميرا هيا اللي بتبعد
طلعت القاهرة بتبعد عننا..يمكن علشان إتغيرنا
وصوت من عمق وبعد ينادي
.................
إنما الأمم الأخلاق مابقيت
فإن هم ذهبت أخلاقهم ذهبوا
....
ويسدل الستار وإلي مشاهد أخري

26 comments:

أميرة البلطجية said...

حمادة بيه وامثاله
ده توارد خواطر للمرة المليون
:)
الفرق بين دول وحمادة بيه..ان دول في نعمة..مش فاهمين نفسهم..مشكلة حمادة انه بيهرب بالقصد..عارف قدام نفسه انه ضعيف..وده زيادة ف الذل والمهانة
كل تحياتي واحترامي ليك

ريما said...

no comment
:(

shabfa2re said...

موضوع جميل اوى
بس الاخلاق مش بالالفاظ بس
لسه فى كتيـــــــر
اللى مغرور والمصلحجى والمنافق و و و

tota said...

مجهول
للاسف كل المشاهد حقيقية ومن واقع مدينتى ساعات بشوفها مخيفة لانها بعيدة عن كل الاصول اللى جيلنا اتربى عليها
وساعات بلاقيها عادية بتاعة جيل ميعرفش اى مبادىء ومش ذنبه انه ميعرفش
تفتكر ده خطأ مين فى المجتمع
السلوك خطأ فردى ام جماعى
اظن جماعى بداية من اسرة مش بتوجه صح الى مدرسة مش بتعلم لا تربية ولا تعليم الى اعلام مشوه بيعرض بذائات الى مجتمع راضى واخيرا ضمير انسانى مهمش
النتيجة مشاهد مثل التى نراها جميعا ولا نعرف الى ماذا يؤدى بنا هذا الطريق
ولا عزاء للسلوك الانسانى المحترم
تحياتى

Anonymous said...

حلوة مشاهد سينما الواقع دى

كل أبطالها جيل واحد
مبادئ واحده
أو يمكن الاتفاق العام على محو مبادئ بالية

:\

copa said...

يامان كل الي اقدر اقولهولك من نحية تعليقي علي البوست كل ما الانسان او المجتمع عن الدين للاسلامي كل ما كان ده حالنا و بنعمل بوستات بنتمني نرجع فيها للثواب لكن شكرا لسه محتاجين كل واحد ضربه تصحية ربنا يلطف بينا

امابقي علي تعليقي العام عندك مدونتك لذيذه و البوست عاجبني بس شد حيلك عايزين اكتر

مجهول said...

مولاتي الاميره
والله شكله بقا توارد خواصر وافكار
ههههههههه
وربنا يكون في عونهم كلهم
حماده وغيره
تحياتي ياللي دايما مشرفاني

مجهول said...

ريما
انا شايف برضه كده

مجهول said...

شب فقري
اهلا بيك في مدونتي
اولا الصوره اللي انته حاططها لايقه اوي علي شب فقري
وشكلك دمك عسل
وسعيد بمعرفتي بيك وحزورك قريبا انشاء الله
عزيزي
لم اقصد فقط الالفاظ
بل التعامل
وفي التعامل كل شئ
ليست مشاهدي هذه هي النهايه والحصر للمشكلات
بل كثير وكثير وكثير
تحياتي

مجهول said...

نبيذ
سينما الواقع
سينما المأساه
قلتي فعلا ان المشكله مشكله جيل معين
ياتري ليه؟؟
تحياتي

مجهول said...

copa
اهلا بيك يا عزيزي وصديقي الجديد
وسعيد بزيارتك
انا الان اتصفح مدوناتك
هما كتير كده ليه
ماتسيبونا ناكل عيش شويه بقا ياراجل
فهمت انك تقصد البعد عن الدين هو السبب
اري انه سبب من اسباب كثيره
البعد عن الدين
البعد عن الادميه
اللامبالاه
الظلم الفساد
الغش الغرور
حاجات كتير
مش منطلق ديني بس منطلق حياه ذاتها
تقاليد وعادات ومبادئ و و و
.......
ومتشكر يامان علي كلامك المشجع
وادينا كلنا بنكتب علشان بكره افضل مش عاملين مقومين وناقدين للمجتمع
بس بنغير نفسنا قبل مانغير اي حد تاني
تحياتي

مجهول said...

توتا
اختصرتي كعادتك وغهمتيني كما عادتك دوما
الخطأ نحن من صنعناه وشاركنا فيه
اخرجنا جيل افسدنا ذوقه وسمعه وبصره وعقله ونفسه وضميره وقلبه
وطالبناه بالنجاح
تحياتي

المٌهَــــاجِر المَصْـــــــرى said...
This comment has been removed by a blog administrator.
المٌهَــــاجِر المَصْـــــــرى said...

مجهــــــول الحاضر
المشاهد اللى انت كتبت عنها دى موجوده بس فى افلام عاديه متاحه كل يوم لاى حد من غير سن ولا بطاقه
فى بأه مشاهد تانيه من افلام للكبار فقط..
مشاهد تقولك مش ان القاهره بترجع للخلف..الوطن كله يا صديقى..

koukawy said...

ياه ه ه ه ه
انا سمعت كلمة اخلاق دي مره في فيلم عربي ابيض بس و ده كان قبل الأبيض و الأسود بحوالي 20 200 سنه كده
هههههههههههههههههههههههههه
ان هم ذهبت اخلاقهم مش ذهبوا بس
دول ذهبوا في ستين داهيه
انت فعلا حطيت ايدك علي مشاهد مكرره كتيييييييييييييييييييييييييييييييييير

محض روح said...

كتبت فى حالت مختلف بس نفس المعنى ونفس الصوره فى كل حاله
فى فجوه غريبه زمان قالو
إذا أردت
تعرف شعبا فأبحث عن رموزه واذا اردت ان تعرف امه فاسال عن ابطالها واذا اردت ان تدرك احلام الناس فاسأل عن القدوه فيها
ومن خلال ذلك تستطيع ان تضع الزمن
الذى نعيش فيه فى مكانه الصحيح او مكانه الخطأ
تعرف يامجهول
المشكله كمان فى ايه ان كل حاجه صغرت فى عيون الناس
وكله بقى عااااااااادى

تحياتى يافندم

مجهول said...

أستاذي الرأفتاني
سينما الصغار اهون
سينما الكبار انا عايشها
وبيني و بينك كده
فيه ناس ممكن تنزل فيا شتيمه واهانات وتتهمني اني بفتري علي الناس اللي زيهم
الصغير اخطاؤه صغيره بس حتكبر مع عمره
حيبقا كبير في غلطه كمان سنتين تلاته عشره
كبار صغار ربنا يستر
ارحمنا يارب
تحياتي

مجهول said...

كوكو
وانا كمان سمعتها برضه من بتاع مليون سنه كده
لو لقيتي كيلوا ابقي افتكريني بشويه
ماشي

مجهول said...

المشكله كبيره يا محض روح
مشكله ان الخطأ اصبح صواب
اختلاف المقاييس
موضوع تاني ينفتح وموضوع تالت ورابع

كل اللي اقدر اقوله ربنا يستر
............
شكرا لتشريفك ليا
وتحياتي

شهيدة said...

حلو أوي يا مجهول


هههه

أفكار جميلة ومشاهد جميلة كمان


ربنا يوفقك كمان وكمان

حنيـــــــن said...

عجبتنى اوى المشاهد الموجعه اللى سلطت عليها الضوء

دايما بتعجبنى الوقفات والمشاهد فى الكتابه
لانها دايما بتكون لقطه من حياتنا بتمر علينا كل يوم وبنمر عليها وخلاص اخدنا على وجودها وما بقيتش بتثير فينا اى مشاعر استياء
التعود والاعتياد اللى غير فينا حاجات كتير
بجد بحييك على اللقطات الجميله دى
المشاهد من التالت للسابع وجعونى اوى
اوى
كل واحد منهم صفعه لاخلاقنا اللى راحت
تحياتى

أحمد ندا said...

بس انت كده مش مجهول أبدا
انت معلوم بقلبك وروحك ولقطاتك الذكية

amira said...

ثانية واحدة يا دكتور

1- في فيلم مطب صناعي البطلة هي نور
إذن من الواضح إنهم مش فاهمين حاجة
بغض النظر عن الفيلمين أصلاً
ـــ
2+3-اللي بترقص دي دينا
ويعني برضه ... دي .... دينااااا
ــ
4- ما علينا إيه بكام
المهم
جبت الكتاب ؟
ــ
5+6- الجامعة
!!!!!!
ـــ
7- عشرة جنيه ؟
بس ؟
ههههههه
ده أكيد من 3 سنين
ــــ
أخيراً
على الأقل
أُغنية الكمي كمي كا
أعترفوا بها رسمياً كأغنية هابطة
لكن سعد الصغير عمل 3 أفلام في سنة واحدة

ياااه
فين شعبان عبد الرحيم
وفين أيامه


آآآآه ياني

lonely said...

بصراحه انت جبت مشاهد بتستفزنى يوميا من اول حمى العنب وايظن
اللى اجتاحت كل ركن فى مصرمن موبايلات وتليفزيونات واعلانات لما الواحد كره العنب والفواكه كلها
لحد الشباب التافه بتاع تسالى اللب والسودانى اللى بقم كتير اوى
بجد استفزيت جدا
لان النماذج دى سبب تاخرنا وجهلنا ونظرة الاخرين لينا على اننا همج ومقلدين تقليد اعمى وبس
ربنا يهدى شبابنا ويفوق بقا ويصحى ويفتكروا ربنا شويه

ام العيال said...

really i liked them so much
:)

arab girlscool said...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول