Thursday, April 26, 2007

قصة نصب

قاعد في أمان الله قدام التلفزيون
رن الموبايل .. رسالة
أفتح الرسالة ألاقيها
تم تحويل رصيد 40 جنيه من رقم كذا
وأخيرا إستجابة السماء
ياما إنته كريم يارب
وجاء الفرج من عندك يارب
وهممت بالسجود لله شكرا

........
ولقيت الموبايل بيرن
أيوه
السلام عليكم
وعليكم السلام يا فندم
أنا أسف يا خويا معلشي
أنا غلطت في الرقم اللي بحول ليه
طيب عادي و لا يهمك ححولك الرصيد حالا
.......
أمسك الموبايل بكل شهامة و أبدأ أحول
ألاقي الولية بتاعت فودافون بتقولي
رصيدك لا يسمح
الله إزاي
أستعلم عن الرصيد ألاقيه ولا زاد نكلة
أقعد أفكر بتاع ربع ساعة
أصل تفكيري علي أدي
أاااااااااااااه
يا إبن العفريتة
هاهاهاهاهاها

.........
صدمة الفرح
بمجرد وصول الرسالة لسيادتك وفتحها
ستصاب بصدمة الفرح لتحويل الرصيد
ولن تحاول الربط بين الرقم المرسله منه الرسالة
و الرقم الذي يدعي أنه تم التحويل منه
وهما رقم واحد!!!هههههه
..........
صراع نفسي .. خير وشر
ستقع في صراع نفسي بين الطيبة و إستغلال الفرصة
وستجد داخلك صوتا يردد أنها هدية للسماء
وصوتا يعارض ويرقق قلبك علي الأخ النصاب
وأنه ربما يكن في أشد إحتياج للرصيد
وسيقطع الصراع بداخلك رنين هاتفك وتجده يحدثك
..........
الشهامة و الرجولة و الجدعنة
ستتملكك الرجولة و الشهامة
و ستعتذر للرجل وتعده بتحويل الرصيد له
فهو رجل طيب وذو صوت هاديء و عميق
يا سلاااااااااام
......
شربت المقلب وكل مقلب و إنته طيب
....
أعتذر بشدة لغيابي عن التعليق
علي مدونات أصدقائي الأعزاء
رغم تواصلي الدائم مع كل جديد لديهم
لظروف السفر

42 comments:

Unknown said...

عارف ؟

أنا كُنت عاملة برنامج مقالب للتلفزيون المصري في رمضان من كام سنة

لو كُنت بس قولتلي على المقلب ده بدري شوية ؟

معلهش يا دكتور

محمد عبد الغفار said...

لن اتعرض للصراع فقرار رد المبلغ سيكون اسرع من اتصاله بى

لن الاحظ موضوع الأرقام ده فى البدايه وقد تنطلى على اللعبة

ولكن عندن محاولتى للرد المبلغ اعتقد انى سأكتشف حيث انى ولا بد سأتعرض للرقم مره ثانيه

يا ولاد الجنيه

Reema said...

ايوه انا سمعت عن المقالب دي

احنا كمصريين بناخدها حكاية جدعنة وشهامة وامانة
:))

المشكلة انك بقى تحوله الرصيد
وبعدها تكتشف اللعبة دي
المهم انا اول مرة سمعت عنهم قلت يمكن واحد كده وخلاص اظاهر هما كتير بقى
ههههههههههههههههههههه
يلا تعيش وتاخد غيرها

Dr.khaled said...

ههههه
الحمد لله انك لحقت نفسك في الاخر
قبل ما تحول الرصدي
بس يا خويا لي سؤال
يا ترى انت سجدت لله شكرا ..بعد ما عرفت ان ربنا الهمك ان الموضوع اشتغالة؟؟
الحمد لله على كل حال
بس حركة حلوة... اجربها مع زمايلي...بس هبقى اديهم الفلوس
انش اء الله :)
متبقاش تطول الغياب...يا جميل

Amany said...

على العموم ربنا ستر

لكن انا بقول طالما انت شهم للدرجتى نزلنا نمرتك علشان اللى يحتاج رصيد يقول ببساطة ومن غير مقالب

Anonymous said...

ههههههههههه
انا بقا وصلنى كتير وبالهبل من الرسايل دى وفعلا الرصيد بيزيد وبطريقة مجنونة خللت اخويا لاصغير يشد شعره منى ويحسدنى على أنى مبخنتة ورزقى فى رجلى

واختك استغلالية لأقصى درجة تتخيلها
لأن اصلا محدش اتصل وقاللى انه وصلنى غلط
اللى بيبعت بيسكت وامره لله

وأنا أقعد مستغربة من شهامة البنى آدميين الايام دى
ويطلع الموضوع كله غلطة فى رقم او رقمين من المرسل اليهم اصلااا
ويقعوا من نصيبى أنا

اسكت
اختك غلبااانة ونيتها صافية

نيااهااهاااا

Anonymous said...

ههههههه
ربنا يجعل بيت المحسنين عمار

مجهول said...

أميرة عزيزتي
تلفزيون وراديو وحاجات كده
الله يسهلك يا ستي
ماشيه حلاوه المقالب و بتوكل عيش
هههههههه

مجهول said...

محمد باشا عبد الغفار
والله انته راجل طيب
انا عمري محعمل زيك
علي الاقل حدخل في صراع نفسي بين استغلال الفرصه و بين الحق
بس يمكن بنسبه اكبر ارجع للحق
ربنا يهدينا كلنا يارب دايما للحق والصح
بس بجد فكره جديده ودماغ النصاب ده تتلف في حرير زي ايد النشال كده
هههههههههههه
تحياتي

مجهول said...

ريما
لاااااااااااااااااااا
دول كتير
احنا يا بنتي شعب دمه خفيف و بيعبي الهوا في أزايز و بيبيعها
ههههههههههههه
مبتكرين دايما

مجهول said...

اخي العزيز خالد
اكيد بحمد ربنا في كل وقت
حتي لو حولت رصيد يعني و فيها ايه
المهم الصحه ياراجل
ههههههههه
جربها مع زمايلك و ياريت تعرفني النتيجه
وشوف كام واحد حيشرب المقلب

مجهول said...

اماني
انتي بس تؤمري
رقمي وصاحب الرقم ومحفظه صاحب الرقم تحت امر جنابك
هو الكلام بفلوس
ده بلاش
وابقي قابليني لو طلتي مني شلن
ده الضنا غالي قصدي القرش غالي
وعضي قلبي و لا تعض رصيدي
تحياتي

مجهول said...

المبخته شهرو
بقا انتي حظك عالي
اتاريك شغاله رغي في التليفون ببلاش
صحيح
الدنيا دي حظوظ
ناس تشحت رصيد و ناس يجيلها لغايه عندها
حكم
حكمتك يا رب
ارزااااااااااااااااااااااق
قال نيه صافيه قال
طيب ما انا نيتي صافيه مش بلاقي رصيد ليه
وغلبان غلب الدنيا و الاخره ولاقي حد بيعبرني بشلن
ارزاااااااااااااااااق
نياهااااااااااااااااهااااااااااااااااااااااااااا
انتي تستاهلي كل خير

مجهول said...

نبيذ
غبتي عليا قوي من فتره مش بلاقي تعليقاتك القصيره الجميله
امين يارب
وملاقيش معاكي بريزه سلف
او55 جنيه رصيد
ويجعل بيتك عمار قادر يا كريم
يا نبيذ يا بنت ام نبيذ
هههههههههههههه

أميرة البلطجية said...

المقلب ده بظظببببببببببببط لسه حاصل لواحد صاحب مشمش (وزير الدفاع والداخلية وما شابه) وكان كاتب عنه في بوست مرة..انا عايزة ان النصب وصل لاكتر من كده ..مرة قريبتي كانت بتأجر شقق وواحد اتصل بيها واعد يقولها عن ناس اغنياء جدا عايزين يأجرو شقة..وبعدين خد العنوان وقال انا جاي حالا..[س معلش انا اسف انا مش معايا رصيد ممكن تيجيبلي كارت وتقوللى الرقم وححاسبك اما اجى..وبمنتهي ال..........راحت اشترت الكارت وقالتله الرقم وطبعا مشفتش وشه
بلاوى والله

محض روح said...

مش عارفه اقولك ايه
الي يعيش ياما يشوف
المشكله انهم عارفين ان الشعب طيب
وبينضحك عليه بسرعه اوي
وإلا مكنوش عملو كده

ربنا يتولنا برحمته

تحياتي يا فندم
افندم
بلاش
:)

sara said...

هههههههههههههههههههههههههههه

جامد جدا
بجد ذكي جدا السخص اللي عمل فيك المقلب دا

وتعيش وتاخد غيرها

تحياتي

david santos said...

Thanks for you work and have a good weekend

ام العيال said...

بجد؟؟؟؟؟؟؟؟؟؟؟
هيه وصلت بالعالم للدرجه دي
:(
بابا مره بدل ما يحولي رصيد حوله غلط
و لما كلمنا فادافون يحلي المشكله اصلو مش من الادب اكلم حد ما اعرفوش
الست بتاعت فودافون بتكلمي زبي الكمبيوتر و كانهم ما عندهمش احساس
و انا بحكيلها و هيه بتقولي مش مشكلتنا و تضحك
قعدت ازعق و هي بتقولي شرفتينا
خايفه علشان المكالمه متراقبه
يالله حاجه تجنن

معلش
ما يقع الا الشطار

Reemo said...

المشكله لو كان معاك رصيد يغطى المحول اليك
وتحوله بالغلط كنوع من الشهامه
اعتقد ساعتها المقلب هيقلب بغم
كل مقلب وانت طيب
تحياتى

Unknown said...

للاسف انا اتعرضت للموقف ده مع اصحابي
كتبت عنه
http://mishsyasa.blogspot.com/2007/03/blog-post_3159.html

koukawy said...

اه حقيقي وحشني كومنتاتك بس ياللا خلص اللي وراك بسرعه و ارجع بقي
بالنصبه للموضوع ؛ الانسان لا يكل و لا يمل في ابتكار احدش و اجدد الطرق للمشي الغير سليم او الحرام
طب انت نصيبك طلع ان معكش رصيدتخيل لو كان معاك رصيد كان هيتنصب عليك رسمي

bastokka طهقانة said...

يا نهار ابيض
طيب انت لازم تنشر الموقف ده في كل المجموعات البريدية المصرية علشان الناس متتغشش
انت اللي خدمك ان رصيدك كان منخفض اصلا لكن لو عندك رصيدك كان عالي مكنتش خدت بالك

يا ساتر الناس دي ازاي بتقبل على نفسها الحرام و لا بيعتبروها حداقة

اعوذ بالله

gohayna said...

يالهوي

هو النصب كمان عنيني عينك كدا

وصل للرصيد

الواحد بعد كدا يحط قفل علي التلفون

ليقوم من النوم يلاقي الشبكه مسحوبه



والله هم يضحك وهم يبكي

هنوصل لغايه فين في النصب

خلاص الحيل كلها عملناها

ربنا يعنا والله
تحياتي وربنا معاك في سفرك

مجهول said...

اميره البلطجيه
ههههههههههههه
بجد فكره جديده مووووت
من هنا ورايح حأجر شقق

مجهول said...

محض روح
كويس بلاش يا افندم دي
محسساني انك بتكلمي لوا شرطه
ههههههههه
والله احنا شعب مبتكر
بيعرف ازاي يتفنن ويعيش مبسوط
ويقلب عيشه
ههههههههههههه

مجهول said...

نوني
اهلا بيكي في مدونتي
ومتقوليش تعيش وتاخد غيرها
لااااااااااااااااااااا
انا منضحكش عليا لسه
هههههههههه

مجهول said...

عم ديفيد سانتوس
والله انته مانته فاهم حاجه
عموما
ثانك يو

مجهول said...

ام العيال
يا بنتي والله انا ماوقعت في المقلب متخافوش
ثم النصب ده فن
زي السيما كده
علي فكره تعليق حبيب ديفيد سانتوس فوقك اهوه
ههههههههههههههههههه

مجهول said...

ريمو
فعلا حتبقا غم

مجهول said...

مشمش
اشكرك لزيارتك
وقريت البوست
وربنا يستر النصب بقا في كل حته

مجهول said...

كوكي
والله انتي ليكي وحشه كبيره اوي
لو معايا رصيد
مش عايز اتخيل عشان اعرف انام
هههههههههههههههههه

مجهول said...

الطهقانه هانم
يا نهار فل
النصب وصل كل حته
وشكل معاكي رصيد كبير
ههههههههههه
الله يبارك يا ستي
بلاش أر

مجهول said...

جهينه
هههههههههههههههههههههههههه
قفل علي الموبايل
يا خرابي
ههههههههههههههههههه
افرضي الموفتاح ضاع حتفتحي الموبايل ازاي ولا حتجيبي نجار
يفش الباب

عصفور المدينة said...

حصلت معانا بس حظها وحش في خط بزنس
قلت لها حظك وحش الخط ده مش بيتحول له رصيد
قالت لي ازاي دي الآنسة لسة محولة رصيد من عندي قلت لها والرسالة جت من عندك ليه مش من فودافون تقفلي ولا تحبي اتصل بفودافون قفلت جري
أصل محسوبك ابن بلد بس دقرم

مجهول said...

عصفور المدينه
ماشي يا دقرم
ههههههههه
انا بقا خطي يا سيدي مش بيزنس
واللهم لا حسد
ههههههههههههههه
كرت وحياتك
بس اول مره اسمع ان فيه كمان بنات نصابيين
الواحد يخلي باله بقا

حواء said...

كل مقلب وانت طيب يا راجل يا طيب .. مع الاعتذار لصباح ..

خمسة فضفضة said...

السلام عليكم ورحمة الله وبركاته




بس كويس ان رصيدك ما كانش فوق ال 40 جنيه والا كان زمانك محولهم له بكل طيابه
ههههههههههه

معلش تعيش وتاخد غيرها ....ههههه

مجهول said...

بوسي
لا مش أنا اللي أبكي
لا مش أنا اللي ينضحك عليا
مع الاعتذار لعبد الوهاب
.........
ههههههههه
تحياتي

مجهول said...

دكتوره فضفضه
وعليك السلام ورحمه الله وبركاته
اعيش انشاء الله
بس خلاص
الواحد بيتعلم
ده مش حأامن لاخويا علي الرصيد بعد كده
عض قلبي
ولا تعض رصيدي
ههههههه
تحياتي وسعيد بزيارتك

Esmeralda said...

لو حصل ده معايا و لا كنت حاخد بالى و كنت حعمل اللى بيقول عليه زى الجردل
لأنى حتى الان مش فاهمه موضوع تحويل الرصيد

اهو كلام و السلام

اسكندراني اوي said...

تصدق انا اول مره اسمع عن الموضوع دا بالذات حتى دي كمان
اي شيطان يوحي لهؤلاء بذلك فعل ............ حلوه دي