عبد الناصر بين الحلم والكابوس
لو أردت يوما أن تبحث عن مواضيع مثيرة للجدل والأراء المتناحرة
ستجد حتما ثورة يوليو وجمال عبد الناصر أحدها
أينما إرتحلت في مصر بشمالها وجنوبها
تبقي ثورة يوليو .. ويبقي عبد الناصر
من أكثر الموضوعات جلبا للعواصف والأعاصير
عرفت أناس ذابوا عشقا في الرجل .. تغنوا بإسمه وأحبوه للثمالة
وعرفت أناس كرهوا الرجل للنخاع .. كرهوا ... حتي إسمه
وهكذا
بين محب عاشق متيم بالرجل وبين كاره ناقم عليه عشت
............
ما يحيرني جدا
أن عبد الناصر نفسه قد رحل منذ ما يقارب 37 عاما
وكان دوما و مازال وسيظل أبدا
مجالا خصبا للحوار والجدل والإختلاف
............
مازال حلما وأسطورة لمحبيه
يحملون صوره ويهتفون بإسمه في مصر .. في العراق .. في فلسطين
أينما كان الظلم والقهر ستجد صورته رمزا
رمزا للحلم الضائع .. للزمن الجميل .. للكرامة والكبرياء
يتغنون بإنجازاته .. يستشهدون بصورته المنقوشة في قلوب العامة
ستجد صورته في قلب عمال المحلة وشبرا و نجع حمادي
ستجدها في قلب فلاحي مصر في الريف والصعيد
ستجدها في الجزائر وفلسطين والعراق واليمن
ستجد بصمته في قناة السويس .. وستجدها أيضا محفورة علي السد العالي
سيحدثونك عن نزاهته وإخلاصه وحبه للوطن .. عن كاريزما الزعامة
سيحدثونك عن دول عدم الإنحياز والقومية العربية والوحدة
عن حركات التحرر .. عن إرفع رأسك فقد مضي عصر الإستعباد
سيحدثونك عن الطبقة الوسطي وخريطة مجتمعية تغيرت ومجانية تعليم
وأخيرا سيرددون .. كان حسن النية .. مبتغاه يري الوطن عظيما
...........
ومازال نقطة سوداء وحقبة مظلمة لمعارضيه
يحمّلونه الضياع والإنكسار والهزيمة
أينما كان الظلم والقهر ستجد إسمه مثالا
مثالا للطغيان .. للديكتاتورية .. للخداع .. مثالا للظلم
ستري بعينك أثار سياط جلاديه علي أجساد من قالوا .. لا
سيحدثونك عن الشعارات الزائفة .. عن حاشيته من أهل الثقة لا من أهل الكفاءة
سيحدثونك عن شهدائنا في سيناء واليمن .. عن 67 سيتحدثون
عن الأقلام التي كسّرت والأفواه التي كمّمت والأيدي التي كبّلت
سيحدثونك عن شباب غاب في السجون عقودا وأفكار دفنت مع أصحابها
سيحدثونك عنه في مظاهرات عام 68 .. وفي كرداسة و كمشيش
وأخيرا سيرددون .. الطريق إلي جهنم معبدة بالنوايا الحسنة
جمال عبد الناصر حسين .. كم أنت مثير للجدل
............
إحنا شعب طيب جدا
لما نحب حد .. ياسلام .. نرفعه للسما
ولما نكره حد .. يالهوي .. نخسفه لسابع أرض
بعض الهائمون في عشق الرجل يتعامون عن أخطائه وخطاياه
بعضهم يدافع عنه ويأوّل ويبرر في أخطائه
وبعض الناقمون عليه يتعامون عن أي إنجاز أو حسنة حققها
بعضهم يسبه ويلعنه وصلت للطعن بدءا من وطنيته إنتهاءا بدينه
...........
جمال عبد الناصر
لم يكن فارسا أسطوريا قادما من حكايات العرب المنسيّة
بل كان أحد إفرازات هذا الشعب بطموحه و جموحه
كان رئيسا لمصر لفترة تقارب 18 عاما .. له ما له وعليه ما عليه
أخلص الجهد لخدمة بلاده وقضية أمته .. حاول تطبيق فكره ورؤيته
فنجح في أشياء .. وأخفق في أخري
مثله مثل غيره ليس أبدا فوق النقد .. فهو جزء من تاريخنا وحاضرنا
سيظل دوما .. له ما له .. وعليه ما عليه
لكن
رجلا مثله يستحق منا الإحترام حتي في نقده .. إختلفنا أو إتفقنا عليه
كنا معه أو ضده .. فقط ليكن علي أقل تقدير
إحتراما لمقام رجل .. كان رئيسا لبلدنا
وإحتراما لرجل رحل عن عالمنا ولن يعود ليدافع عن نفسه
نهاية .. رحم الله الرجل .. وغفر الله له ولنا جميعا
73 comments:
ايه ياهم الدبلوماسية دى
جمال عبد الناصر ده من اول الناس اللى لبسونا فى الحيط
وجت ناس بعديه هدت علينا الحيط وغرقتنا فى سابع بحر
ياعم قول كلام غير ده
لولا ثورة يوليو لكان وضعنا لايختلف عن وضع ايطاليا وفرنسا دلوقتى
كنا هنبقى دولة متحضرة
مش دولة متخلفة بفضل الثورة
ثورة عيال صيع من الجيش نهبوا وسرقوا قصور اسيادهم
كنت حياديا زيادة شوية
أحوال الأمة هي دين واجتماع واقتصاد وسياسة داخلية وخارجية وعسكرية وإعلام وتربية وووو
أين هو من كل ذلك
كشف الحساب خسران شويتين تلاتة أربعة خمسة ستة
الميزة بس إنه كان عصر ثورجي وخطابات بل وحالة حروب والناس بتهيص في الوقت ده وتنسى ميزان الأرباح والخسائر فاللي نقلوا الحالة للي بعديهم بالعدوى نقلوها عن حالة عصبية قومية انفلاتية ضاعت فيها كرامة الأمة وضاعت فيها مقدراتها ونهبتها عصابة الاتحاد الاشتراكي التي تحورت عدة مرات حتى وصلت غلى ما نحن فيه
اولا احييك على البوست
ثانيا انا من خلال معلوماتى البسيطه واللى عرفتها من ناس عاشوا الفترة دى ان عبد الناصركان شخصيه قويه لكن مش بالقسوة اللى البعض بيتكلم عنها
كان دايما بيفكر يعمل حاجه للبلد دى اللى اتربى وعاش فى خيرها وعمل ده فعلا لكن مفيش حد فى الدنيا كامل لان الكمال لله وحده ,فكان طبيعى انه يبقى فيه اخطاء وطبعا كان من الاخطاء دى كان هيئه المنتفعين اللى كانت من اللى حواليه وطبعا انا مش بخلى مسئوليته من ده بس مش هو لوحده وافتكر ان اللى بعديه عمل ماهو اسوء
جمال عبد الناصر كان ومازال شخصيه لها احترامها وحب الناس ليها اللى لايمكن حد ياثر فيه
تحياتى
أتفق مع عصفور المدينة فى أغلب ما قاله
وأضيف أنى شخصياً أشعر بالخسارة الكبيرة أن شخصاً بكل هذه الجاذبية وكل ما توفر له من دعم الشعوب فى بلاد كثيرة جداً عربية وغير عربية لم يستطع أن يصل بشعبه وبلده لحالة من الإعتماد على النفس
لايوجد تفسير لذلك غير وجود أخطاء جسيمة فى أساس حكمه
لكن ده ماضى والمفروض إننا "نبص قدمنا على شمس أحلامنا نلقاها بتشق السحاب الغميق" زى ما جاهين قال
بجد بوست جميل اوي يمكن من الحاجات القليلة اللي قريتها ولقيت فيها موضوعية عن عبد الناصر
من وجهة نظري عبد الناصر كان احسن حد جه علي البلد دي له اخطاءه ومزاياه زي اي حد لكن كان بيعجبني فيه انه كان ماشي بمنهج معين وبيطبقه كان منهجه فيه حسن نية وروح مصرية جامدة عشان كده كنت بحس انه مواطن مصري وصل للحكم وده تلاقيه من احساسه بالطبقة التعبانة زي حوار الاصلاح الزراعي وقراراته الجريئة زي التاميم كل دي بتحسسني انه كان شخص عادي مصري ويمكن ده من وجهة نظري سبب اخطاءه انه مدالوش الحنكة والخبرة الكاملة بتاعة المنصب بتاعه في بعض المواقف فكان من نتاجها النكسة مثلا اما بخصوص حكايات التعزيب وكده يعني فمفيش مكان في العالم خلي من الكلام ده والله اعلم بقي ده حقيقي ولا لا ولا كانوا مظلومين ولا لا لكن انا عن نفسي كفاية اني اشوف ايرادات القناة اللي بتاكلنا عيش لسه عشان اقول الله يرحمك ياعبد الناصر وعندك غيره قعد عشرات وعشرينات وعمل ايه
بس علي راي حد علق قبلي ده ماضي ياريت نبدا من بعده لان كونه كان حلو او وحش مش هتفرق معاانا دي بتاعة ربه بس
تحياتي يافندم
بوست بيتكلم على موضوع رائع
مع احترامى لكل الاراء الى الت
أن الماضى ماضى ده صحيح لاكن ديما الماضى
بيترك اثره داخل النفس خصوصا لما بيكون متعلق بحاجه كبيره أو أحداث جسيمه لانه بيكون نفسيه امه
حتى بعد مرور مئات او الاف السنين
عبد الناصر أحد هذه الاحداث التى مرت
على الوطن العربى
أتفق أو أختلف
ليس هذا الذى يشغلنى الذى يشغلنى
لماذا دأما نحن متطرفين
فى الحب أو الكره
من الممكن ان نكون حياديين ونقول كا الحقائق
السيىء و الجيد
مثلما فعلت انت
ولذلك لك كا التقدير العميق
شكرا لك
عجبني هدوء السرد
جمال عبد الناصر
مش عارفه ليه حسه كان ترمومترالفئه البسيطه
ديما بيفكر بعقلهم
بيحب ويكره ويخاطر بنفس شكلهم
يمكن الي خلى كتير من الناس يحبوه اوي كونه كان منهم
وبجد بضايق من الي جين يحكمو شخص مات
طلبين منه انه يبقى كامل
ميغلطش كلنا لينا هفوات
الكمال لله وحده
وده خلاص راح عند الي احسن من كل الناس
ربنا يرحمه
جميل انك رجعت اللوك القديم
رغم ان الجديد كان حلو برضه
عيونا كتير بتتعود على وجود شكل ما
:)
تحياتي يا فندم
كنت ضحيه محاولتك لإن تكون وسطى محايد
عن نفسى لا احسب له الا انه لم يثرى على حساب الثوره وكل ما عدا ذلك فعليه
يا مجهول
الموضه دلوقت هى شتيمه عبد الناصر.. الكل بيشتم عبد الناصر علشان الكل كانوا ولاد بشوات وعبد الناصر اخد منهم الاراضى والفدادين
ههههه
فى حوار مع واحد من دول
سالته
يعنى عبد الناصر ده معملش حسنه واحده فى حياته كرئيس؟؟؟
انت عارف احلى جزء الجزء الاخير
لان فعلا ما فيش حد فوق النقد له ما له وعليه ما عليه
وعلينا الاعتراف بافضاله والاستفادة من اخطاءه
مجهول
انا مقدرة محاولة توضيح جميع جوانب عبد الناصر
لكن تأكد مهما حاولت لن ترضى اى الاطراف
الاغلب ان كل المعلقين نسبة تكاد تكون ضئيلة هى من عاصرت عبد الناصر
الجملة الاعتراضية السابقة تشير الى ان اغلب افكارنا حصدناها من نتائج الثورة ومن التاريخ
لا دليل على صحة اى شىء فى اى تاريخ وكله قابل للتشكيك
اما نتائج الثورة فيجب ان نقارنها اصلا بنتائج اذا لم تحدث ثورة وهذا ايضا مستحيل
فكيف الحكم اذا
الغنى سيحكم بمدى خسائره ايام الملكية والفقير بمدى ما اكتسبه بعد سقوط الملكية
والنتيجة واضحة والتضارب اكيد
ولم يخلق رئيس يُرضى كل الفئات
الرجل كانسان كما اتفقنا لا شىء مطلق فلم يكن جيد او سىء على طول الخط
لكن كلما رأيت جنازة جمال استعيد فكرة هل اجُبر الشعب ان يظهر عواطفه على هذا النحو المنقطع النظير فى جميع انحاء الامة العربية
اما لماذا اذا كان مكروه الى هذا الحد كان موكبه الوداعى اسطورى هكذا
وماذا قدم الملك للشعب وماذا قدم السادات وكانت مرحلته ليست انتقالية وبخطورة مرحلة جمال وماذا قدم حسنى
ولماذا نلوم جمال
احقاقا وعودة للحق ان كل منهم له ايجابياته وسلبياته لكن ما هى نسب كل منهم للاخر ونستطيع ان نقدر ان كان قدم ما يستحق الشكر عليه وكم من الاموال اكتنز لنعرف ان كان يعمل للوطن ام لنفسه
تحياتى
ارجو ان تنضم الينا في حملة ( افضحوا تجار الكيف )
التفاصيل في مدونتي
سأنتظرك
مش عارفة اقول لك ايه عبد الناصر رغم كل مساوئه وكل الاقاويل اللى دارت حواليه لكن انا بحبه مش عارفة ليه رغم ان عيلتنا مكنتش فقيرة واغتنت لا عادى هما كانوا من اصحاب الاطيان ورغم اللى حصل انا معجبة بشخصيته وبرضه مش عارفة ليه .. تحياتى
زمان
كنت دايماً أسأل والدى الذى كان وفدياً
هو السادات كويس وللا وحش؟
طيب هو عبد الناصر كويس وللا وحش؟
ولا أذكر الغجابات لأن والدى كان يبحر فى الحكى عن الاثنين .. ويسهب حتى يطالنى النوم
كان عليه فقط أن يقول ما عرفته بعد زمن
أن ما من إنسان كامل فى هذه الدنيا
وسؤالى الغريب عن تصنيف الرجال سؤال طفلة لا تعلم
اكتشفت انه ليس الزعماء فقط هم من يختلف عليهم الناس
فناصر كان وحش بالتأكيد فى عين الوفديين
وحلو أكيد فى عين أبناء الثورة
اكتشفت ان كل منا يحوى هذا الجزء الوحش وذلك الجزء الحلو
الامر يعتمد على مكان وزاوية الرؤية
الله يرحمه
بوست رائع يا مجهول
اولا احيك على البوست الرائع دة
عبد الناصر كان شخصيه دبلوماسيه تريد تجمع العرب وتريد الخير لكل عربي ولكنه اعتمد اعتماد كلي على من حوله لكي تقوم البلاد من الداخل ولكنهم لم يكونو محط الثقه لذالك كان لايقدر ان يصلح من الداخل والخارج وكانت البلاد ضعيفه وهزيله
هو شخصيه جميله وبصراحه عمل الي عليه وزيادة في هذا الوقت كفايا تأميم قناة السويس
انا بعتذر للاطاله
تحياتي
عزيزي مجهول انا اتابع كتاباتك دائما و هنا اول مره اعلق عنك عشان الموضوع جذبني جدا انا موافقه علي كلامك جدا مافيش حد كامل و مافيش حد فوق الخطاء و الخساره و مافيش حد هايجتمع علي احد و لكني كل ما اري جنازه هذا الرجل اجدني افكر كيف يكون الكره دخل قلوب هؤلاء المصرين لهذا الرجل لا اجد سواء ان الحب و التقدير هما ما في داخل الناس لهذا الرجل لعل دعائهم في هذا اليوم رحمه و هو بين يدي الله ففي الموت تعرف من كان يحبك و من احب يوم وفاتك لانك مت و جنازه ناصر الف دليل علي حب هذا الرجل بالرغم اخطاؤه الكثيره تحياتي لك
بص انا صحيح محضرتش ايامه
بس من كميه الحب الرهيبه الي كانت موجوده والي لازال الناس بيحملوها في قلوبهم انات حبيته
يكفي ان في اي مظاهر تلاقي صوره بتترفع عشان يكون رمز وتعبير عن الكرامه والاباء والاحترام
وبرضه عايزه اقولك ان كل عصر وليه اخطائه وعيوبه
مش كل حلو ولا كله وحش
اكيد برضه كان ليه اخطائه زيه زي بيقيت البشر
بس في المجمل
بصراحه ايامه كنا حاسين فيها اننا عندنا كرامه والله
تسلم ايدك علي البوست الجميل دا
وسعيده بزيارتك جدا جدا
ليا
واتمني اشوفك دايما
تحياتي ليك
عبد الناصر مثال للزعامه العنتريه او الزعامه عن جهل
فهو كان يريد الصالح و لكن الصالح لا يأتى من غير دراسه و ترتيب ولا يأتى بشعارات وهميه عنتريه
عبد الناصر كان وطنياً الا ان جاءت اللحظه التى امسك بها الحكم و هنا ضاعت وطنية عبد الناصر لتحقيق حلم شخصى بعيد عن الماده و هو حلم الزعامه و التى لم يكن اهلاً لهااااااااااااا
تحياتى يا صديقى على هذا الموضوع الرائع و تناول جوانبه بشكل ثلث و ملخص
ثورة ايه ؟
الثورة هي ما يطلق على تظاهرة سنة 1919
اما ما حدث في 1952 فهو انقلاب عسكري اطاح بالحكم الملكي
و ليتنا كنا في حكم الملكي الى الان
أقتربت من الوسط الذهبي وهو خير وأجدى من لعن الظلام
تحية وتقدير
عذرا للتحليق خارج السرب ارجو منكم التضامن معي في حمله نقطه ماء تساوي حياه
تحياتي
جمال عبد الناصر زعيم الأمة العربيه
رمز الكرامة
..رجل حر الدول العربيه
كان حلمة وحدتها وقوتها
وقال لا لحلف بغداد المؤامرة علي العراق
قال لا لاسرايل
وحاول خنقها اقتصاديا وحصارها
لا حول الله لا حول الله الان يحاصرون اخواننا في فلسطين
الان يتعاونو مع الاعداء علي بغداد
كلن العامل يبتر ذراعه فيرمي في الشارع جائت التأمينات الاجتماعية
كان الاغنياء ذو الاموال والاطيان هم فقط من يتعلمون وبعد ن اصبح التعليم مجاني ..جاء العديد م الناس الان يريدون ان ينسبوا انفسم لطبقة البشوات فيهاجمو عبد الناصر
هتلاقي الاستاذ اللي علق اول واحد لولا جمال عبد الناصر ما اتعلم !!
هو الذي اعطي للعمال والفلاحين حقوقهم واراضيهم
لاحول الله في م يقارنو ناصر بهذا الذليل
...
تحياتي لموضوعك الجميل
..
عندى تاج ليك يا جميييل
أرجو الذهاب ألى مدونه مكان فى القلب وأخذه
انا فى منتصف البوست كده كنت عاوز اعرف انت تبع مين
وبعدين لاقيتك اخذت موقف دبلوماسى زى بعضه ياسيدى
هو فعلا جمال عبد الناصر شخصيه مثيره للجدل
بالرغم من ان عيوبه ومزاياه ممكن يكونوا فى تعادل او عيوبه تغلب
لكن هو احسن من غيره
او برضه مش عارف
هما كلهم زى بعض باختلاف الاساليب
مجرد أنه لا يزال موضوع للجدل بعد 37 عاما على وفاته يعني أنه لا يزال حيا بيننا
بالنسبة لي كان حلما وليس كابوسا
ولكنه حلم لا أتمنى عودته
بل أعمل من أجل مستقبل أفضل منه
طبعا اولا انا اسف للتاخير لان النت عندي قاطع من مده
بالنسبه لناصر فعلا الاختلاف فيه كبير جدا لدرجة التناقض الفادح بين الرايين
كل راي واخد جنب بعيد جدا عن التاني و اعتقد ان من اسباب هذا الحال ان الوثائق الرسميه للدوله لم تعرض علي الباحثين و المؤرخين بصوره تجعل المتخصصين من المؤرخين يرسمون صوره حقيقيه لعصر ناصر او ما بعده فالنتيجه ان اغلب من يكتبون التاريخ الان يكتبون بلاوثائق كتابات انتقاميه او مؤرخين يرفضون الكتابه بلا دليل لانهم يحترمون انفسهم و علمهم
تحياتي
رحم الله الرجل فعلا
لفته جيدة منك في موضوع مكتوب جيدا
تحياتي
قبل التعليق أعتذر لكم جميعا عن تأخيري في الرد بسبب مشاغل خاصة وإن لم يكن ذلك مبررا
أكرر عذري
ميراج
سعدت بتعليقك الاول في مدونتي المتواضعة
ودعني صديقي أرد علي نقاط معينه
..........
قلت لولا يوليو لكان وضعنا كوضع ايطاليا وفرنسا دلوقتي
كيف هذا يا سيدي الفاضل فالدول التي تتكلم عنها مارست الديموقراطية وتداول السلطة وكانت حرة غير محتلة من قبل دول أخري وغير ذلك لم تكن ملكية كملكية مصر يضع وينزع ويفعل الملك من يشاء في أي وقت يشاء ولم تكن فيها حكومات تمكث في الوزارة 24 ساعه وتذهب من حيث اتت ولم تكن احوال شعوبها كأحوال شعب مصر قبل الثورة كنسبة الامية والطبقات الاجتماعيه وأحوال مصر الداخلية بصفة عامة فكيف تساوي بين وضعين مختلفين
ثم قلت انهم صيع سرقوا قصور اسيادهم
الناس سواسية ليس فيهم سيد او عبد
ان كنت تقصد خروج الثورة الجائر علي كل من عاداها ورميه في السجون وتأميم ممتكاته فهو خطأ كبير وقعت فيه وخطيئة كبري ليس عيبا في فكرة الحرية والمساواة التي نادت بها الثورة بل عيبا في الاشخاص الذين طبقوها من منظور مكبوت ومسير للرغبات الشخصية
سيدي الفاضل
الثورة كما كانت لها اخطاء كانت لها حسنات ولو لم يكن لها حسنات اصلا فما يفيد الان من كلمة لولا ولو
فنحن لانعلم الي اي مدي كنا سنكون بدلا من الثورة
من وجهة نظري
كان لابد من ثورة لكن لم يكن لابد من ثورة يوليو سلبياتها التي حدثت وان كانت حدثت فما العمل
اذا فلماذا ندخل في جدل تتخلله لولا ولو حول موضوع اقفل وانتهي
فعبد الناصر له ماله وعليه ماعليه لن نستفيد من حسابه فقد تغيرت معطيات العصر تماما من حولنا فلا نضيع وقتنا في النظر للخلف حتي ولو كانت له بواقي فبالتأكيد الحاضر اهم
...........
اشكرك لتعليقك ودمت بخير
عصفور المدينه صاحب الكلمات الموزونة
احييك علي تعليقك
فميزان الربح ربما خسر مع الثورة في اغلب المجالات
ومعك في نقل حاله القوميه الي حاله عصبية حمقاء ادخلت المنطقة كلها في متاهات ومهاترات
لكن يا استاذنا الفاضل
لم يبقا من الثورة غير الوان العلم ويوم الاجازة فالزمن والمعطيات تغيرت تماما وتركيبة العالم من حولنا تشكلت مرات ومرات فلن يفيد بكاء علي لبن مسكوب ابدا فكثيرا ما اتضايق من كم الجدل الذي ضيع ونحن نناقش في الماضي ولا ننظر اساسا في الحاضر وهو ما دفعني لكتابة هذا البوست
.....
شمعة امل
اشكرك علي زيارتك الجميلة وعلي كده احنا قرايب ان برضه شمعه واسئلي عنوان المدونة
هههههههه
........
انا ضد من يزايد علي وطنيته او من يهاجمها فهو قد رحل عن دنيانا ولن يعود ليدافع عن نفسه
معك ان حاشيته كانت عديمة النفع وكثيرة الضرر والحقت بكل جميل فعله كل عار ولكن الا يعد ذلك علي الاقل خطأ يحسب علي الرجل لعدم اختيار اصحاب الكفاءة
..........
المدونة نورت واتمني تشريفك دوما
عدي النهار العزيز جوي جوي
معك جدا وجدا كمان في كلامك
ايه يفيد نبص ورا ونجادل ونتعارك ونتخانق ما نبص قدام احسن
نتعلم من الصح والغلط ورا وبلاش نجادل في ماضي راح وانتهي
تحياتي
دكتور مستكنيس
كل منا له عيوب وميزات وكل له اخطاء وحسنات وعبد الناصر لو كله عيوب حتي كل ما اريده ان فقط ننظر للامام فقد انتهي عصرة من 37 سنة وانتهت معه وتغيرت بعده نظم وطرق وافكار
العالم يتغير ونحن مازلنا نناقش ثورة يوليو
تحياتي لك علي تعليقك الجميل ونورتنا كالعادة
في القلب دائمة الصفاء
الماضي وان كان انتهي فقط نتعلم منه لا لنجادل فيه
لا لندخل في متاهات لولا ولو وقع هذا بدل هذا
الماضي فقط للتعلم من خطئه وصوابه
لا للجدل عديم النفع
والتطرف في الحب والكره عادة عندنا
نفسيه من مكوناتنا كشعب عاطفي يتأثر بكل من حوله ولازم نتخلص منها لما نحكم في موضوع مهم فالعواطف ليس لها مكان
لك كل التحية والتقدير
تحياتي لك وشكرا مرة ثانية علي التاج
محض رح
الحب والكره من عند الله والافراط فيهما مأساة
عبد الناصر كما رحل مازال هناك من يحبه ومازال ايضا من يكرهه
ومشكلتنا التطرف والافراط في المشاعر
احسن شيء نبص قدامنا وبلاش نجادل جدل عقيم في ماض زال وانتهي
........
النيولوك القديم صراحة جه غلطة لاني مبعرفش في البرمجه والحاجات دي فبوظت التاني فقلت ارجع للقديم بدل ما اللينكات تضيع
تحياتي لك دوما
محمد عبد الغفار
الف حمد لله علي سلامتك
ونورت المدونة بإبتسامتك الجميله
اهي كلها محاولات
انا ايضا احسب له انه كان شريفا واضف لذلك بعض اشياء اخري
شرفتني واسعدتني بسلامتك
دمت بخير
يا مهاااااااااااجر
اولا انته فين مدونتك التانيه؟؟؟؟
اختفت ليه؟
اتاكلت ؟
ثانيا
الموضةدي يا سيدي ليها منتفعين
بيقولوا بصوا اهوه ده كان عصره بوسوا ايديكوا علي اللي انتوا فيه
الرجل كما كان له اخطاء كان له حسنات
حتي لو كانت قليله
لماذا لا نكن محايدين
لا اصادر حق من يكره الرجل لسبب شخصي كمن عذب في عصره او اهان او قمع او او لكن الم يكن زمن مضي وولي
لماذا ننظر خلفنا وننحاز لجوانب من الماضي ونجادل
لا اعرف
تحياتي لك ودمت بخير
اماني
ياااه من زمان مجيتيش هنا
نورتي مصر
ليس هناك بالطبع احد فوق النقد
لنتعلم فقط من الماضي لا لنتحيز ونجادل جدلا عقيما في امور انتهت
تحياتي لك واسعدتني الزيارة الغاليه
العزيزة توتا
والله انا عارف مهما حاولت
بس انا مش عايز ارضي حد انا بتكلم من وجهة نظري
اللي عاصر الراجل من اللي علقوا نسبة ضئيله بس النظرة الي التاريخ ايضا تورث
غير التاريخ والنتائج اللي اتكلمتي عليها
التاريخ ده كل واحد بيروي الاحداث كالاخر لانها وقائع لا تزور لكن
المشكله ان كل واحد يأوّل ويبرر ويفسر من وجهة نظره
معك في نقطة الحكم فكل شخص بشر يكره ويحب ويختلف
وصعب تجميع الناس علي شخص
لكن يمكن ان نكن حياديين فقط
الماضي حدث وانتهي وتغير العالم ومازلنا نتناقش فيه ونتجادل
نتناقش لا لنتعلم منه فقط لنثبت انه كان كذا وكذا
او كان كذا وكذا
......
كل رئيس مر علي بلادنا كان في مرحلة مختلفة عن الاخر
اذن فلدراسته فلتدرس الموروث الذي ورثه ممن كان قبله
الخريطه العالميه وتوزيع تكتلاتها ورياح السياسه وقتها
كل سيختلف عن الاخر في فكر ادارته وطريقته في الحكم
وكل سيختلف عن الاخر في رؤية الناس له
فقط كما قلتي
كل له ما له وعليه ما عليه
ولكن اتتصوري وجود كثرة يفكرون بهذا المنطق الحيادي
واهمة عزيزتي واهمة
حتي التاريخ دخلت فيه الاهواء والتوجهات لترويه وتفسره
........
لك مني تحية وسلام ودمتي بخير
صاحب البوابة معك بالطبع انشاء الله
bocycat
الحب ده من عند ربنا
اعجبتني تلقائيتك ووضوحك
فهو قد مات ورحل له ماله وعليه ماعليه
لم يبقا منه غير تاريخ
تحياتي لك
حلم العزيزة
هههههههههه
انتي علي كده وفدية بالوراثة
ااااااااااااااه
قلتي صراحة ما اردت ان اقوله واوجزتي
ما من انسان كامل في هذه الدنيا
و
الله يرحمه
زاوية الرؤية بقا مشكلتها انها عند ناس متثبته علي الوحش وعند ناس تانيه مش شايفه غير الحلو
تحياتي لك ودمتي بخير
الدمعة الصافية
المدونة نورت بتعليقك الاول عندي
معك حق في نقطة عدم اختياره من هم كفء للمهمات وتفضيله اصحاب ثقته عليهم وده يحسب عليه
عبد الناصر كان يمكن ان يفعل اكثر وافضل
لكن ما يفيد
لو ولولا
ما مات مات والماضي فقط لنتعلم
تحياتي
وانشاء الله ازورك قريبا
دنيا محيرني
تشرفت بمتابعتك لي
واسعدني تعليقك الاول
جنازة عبد الناصر لم يخرج الناس فيها الا بدافع حب
ولكن هناك ايضا من يكرهونه او يحتسبون عليه اخطاء علي الاقل
مهما اختلفنا يجب ان نكن حياديين
لنري السيء والحسن لا نحكم من وجهة واحده
تحياتي لكي ودمتي بخير
جهينه يا صاحبة الخبر اليقين
نورتينا
معك في ما قلتيه
لكن ليس بالكرامة فقط والثوريه فقط نحكم
معك جدا فيما قلتي
ان كل عصر وليه اخطائه وعيوبه
وايضا حسناته وميزاته
فقط حياديتنا في الحكم لنري كل شيء
عيوب وميزات
تحياتي يا جهينه
وتسلم ايدك انتي علي كلامك في مدونتك الجميلة
whyme
سعيد لزيارتك
ربما ده رأيك لكن فيه ناس كتير وانا منهم شافوا حسنات كتير ليه علي القل كما قال محمد عبد الغفار انه لم يغتني من الثورة
انا معك في الخطابات الحنجوريه
بس العصر وقتها كان قايم علي كده
الاتحاد السوفيتي والولايات المتحده وصراع التناطح
الرجل كان ليه كاريزما قويه ويقدر علي جذب الناس
ربما لم يستثمرها تماما كما يجب
ولكن كما له ولعصره سيئات كان لها ميزات
تحياتي لك وتشرفت بزيارتك
شارم العزيز
بالراحة عليا ياراجل بس
نرجعها ملكية ولا تزعل نفسك
ههههههه
صدقني كما قلت في التعليق الاول كنت اتمناها ثورة
لكن ليست هذه الثورة
او لتكن اقل منها اخطاء
تحياتي لك
علان العلاني
نورتني
ربما احتاج ان ابحث بجد دوما عن الوسط
فالحياد منجاة والتعصب مأساة
تحية وتقدير لك
العزيز ابن ناصر
معك في ما سردت من ميزات الرجل وحسناته ولن اناقش فيها ولكنك بالتأكيد تري اخطائه ايضا
فانا بالطبع لا احسبك من هؤلاء الذين لايرون فيه الا صواب
هو له ما له وعليه ما عليه
وغيره له ما له وعليه ما عليه
المقارنه ليست فقط في الافعال
بل في كل شيء
العصور التي عايشوها
مقومات ومعطيات كل عصر
سياسيا واجتماعيا
التكتلات السياسيه في هذا العصر
كل ده وجوه مقارنه داخله في المقارنه
وكما قالت توتا مسأله النسبة بقا هيا اللي تحكم نسبة الخطأ للصواب
ولكن يبقا
انه رحل ولا تجوز عليه غير الرحمة كما يقال
فلنتعلم من اخطائه وحسناته
وحتي من يكرهه فليذكر هذا وذاك
فلا لتعصب اعمي في الحب والبغض
تحياتي لك ودمت بخير
في القلب
علم ومتشكرين علي التدبيس ده
محمد جادو
سعيد لتعليقك
بغض النظر عن النسبة او مقارنته بغيره
ما كنت اعنيه انه ماض
لنتعلم منه فقط
له ما له وعليه ما عليه
وللنظر للحاضر
تحياتي
alzaher
كان حلما ولكني لا اتمني عودته
كلمات متوازنه فعلا
فحتي لو كان حلم فله عيوب ولنعمل علي تداركها في المستقبل او حاضرنا هذا
تحياتي لك
وسعيد لزيارتك
ذو النون المصري المحترم
معك حق
المؤرخون بعضهم يكتب بغرض انتقامي ليس الا
وبعضهم يكتب بغرض تبرير اخطائه ليس الا
فقط من أثرو الصمت عندهم الحقيقة
لكنه للاسف زمن سيء
مع او ضد
ليس هناك مقاييس محايدة للحكم علي الشخص
تحياتي لك ومتبقاش تغيب كده
yasmina
اشكرك علي تعليقك
ورحم الله الرجل
تحيه طيبة
السلام عليكم
تقريبا اول تعليق ليا هنا !
الله يرحم عبد الناصر وأيام عبد الناصر
على رأى ابويا الله يرحمه
انا وانا صغير شوية : ايه رأيك يا بابا فى عبد الناصر !
ابويا : الله يرحمه كانت مصر كلها بتحبه !
متهيقلى دى كفاية !!
مصر كلها كانت بتحبك يا ناصر
وكفاية جنازتك كانت الاعظم وستظل الاعظم فى تاريخ مصر
كانت خير برهان على حب المصريين لناصر
مظنش ان الحب ده كان من فراغ !
تحياتى لك ولمدونتك المحترمة جدا جدا
سلام
أين جديدك يا عزيزي
؟؟؟؟
افتقد حضورك
تحياتي
مجهول
الن تكتب جديد؟
كل ما ادخل اعلق الاقى الموضوع ده
هو بوست هادىء محايد بعيد
عن صلب الرجل
او تقديسه
تحيا تى
رجلا مثله يستحق منا الإحترام حتي في نقده .. إختلفنا أو إتفقنا عليه
حقيقي الجمله دي لازم تتحفر في عقول ناس كتير مش بس عن جمال عبد الناصر
بل وفي كل المواضيع المختلفين عليها
ثاناي عبد الناصر كما ذكرت هو افراز اسخط النظام وسلب حقوق البلاد التي شعر بها الفاص البسيط والمواطن الطحون
هيفضل اللي عملو جمال عبد الناصر جميل فوق راسنا
حتي وان اخطأ
تحياتي
عبد الناصر سواء اتفقنا عليه او اختلفنا معه
كان زعيما
كان يحمل كل مواصفات الزعيم
على فكرة الزعيم مش شرط يكون صح
ممكن واحد يلم حواليه الناس ويكون زعيما وخطيبا ومنبرا لكن يكون غلط
عبد الناصر كان صح فى حاجات وكان غلط فى حاجات
حاجات كتيييييييييير
لكنه كان زعيم
مساء الخير انا جايه امسي عليك
واسال هو مفيش جديد ولا ايه؟
ايه التاخير دا كله حضرتك؟
طمنا عليك من فضلك
حابة أمسى عليك وأقولك احتمال ارجع لكم تانى ولو زائرة
وكمان حابة أحييك على البوست المفيد دةسلام
أيه الكسل ده
فين جديدك يا أستذنا
يوسف المصري
شرفتني بزيارتك واشكرك علي اضافتك يا عزيزي وعذرا لتاخري بالرد
صاحب البوابة المحترم جدا
اشكرك لسؤالك اخي الفاضل وانشاء الله سأعود للكتابة
الجحيم العزيز
انشاء الله حغير البوست قريبا
ومشكور بالزيارة نورتني والله
coca
المدونة نورت بزيارتك واضافتك المحترمة
فعلا لو وضعنا تلك الكلمات كقياس للحكم لما انسقنا للعنف في الحب والتطرف في الكره
تحياتي
ياسمين الغالية
فينك من زمااان يا استاذة
بجد نورتيني والله
اشكرك لتعليقك واضافتك
gohayna
يا من لديها الخبر اليقين
اشكر لك سؤالك وكم اسعدني اهتمامك الرقيق جزاكي الله خيرا وازادك حسن التواصل وحب الناس وقبل ذلك وبعده رضاه تعالي
حواء
تشرفيني في اي وقت
زيارتك تسرني دوما
في القلب صاحبة القلب الرقيق
راجع انشاء الله قريبا
واشكر لك سؤالك واهتمامك
جزاكي الله خيرا واتم عليك نعمة الوصل والتواصل وحب الناس
من وجهه نظري أن لكل قائد وزعيم أخطاء ومميزات
فعبد الناصر يحمل مميزات رائعه للقائد وكذلك السادات
رغم كل الملاحظات علي فتره حكمهم ولكنه يبقي رمز
أحييك علي قلمك الرائع
واول زياره لي ولكن أكيد سأكون متواجد مره أخري
محمد مفيد المحترم
انا متابعك من زمان يا صاحب الصميم
احترم رأيك فعلا
فكلهم لهم مالهم وعليهم ماعليهم
يختلفوا عن بعض في حاجات معينة وفقا لكل واحد والفترة اللي عاش فيها وظروف العالم اللي حواليه
معاك ان عبد الناصر كان اعلا من الجميع في كاريزما القيادة
كان بيقدر يجمع الناس حواليه ويشحذ الهمم وده كان ميزة كبيرة جدا
نهاية رحمهم الله
تحياتي لك ونورتني وسعيد جدا بزيارتك
قلب لغــزة
هل تعرفون، ماذا يعني مدينة بلا كهرباء؟
غـزة منذ يومين بلا كهرباء
مستشفياتها، منازلها، مؤسساتها التعليمية والصناعية، متاجرها، شوارعها
غزة الجائعة تختنق في الظلام
أدعو الجميع
بوقفة أحتجاجية
بتعتيم المدونات ليوم واحد
الخميس
وعلى كل من يعرف اللغات الأجنبية
الإنجليزية والفرنسية والأسبانية والألمانية... وغيرها
رجاء ترجمة هذه الدعوات وإيصالها للمدونين الأوربيين
مع أرسال نسخة للأخرين لتوزيعها
ربما أستطعنا توصيل صوتنا لمن يشاركنا الحب والغضب في اوروبا
Post a Comment